منتدى يهتم بشؤون المصريين و العرب المهاجرين الى كندا


    مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    شاطر

    Nassarlink
    عضو
    عضو

    عدد المساهمات : 78
    تاريخ التسجيل : 29/08/2009
    العمر : 45

    مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    مُساهمة  Nassarlink في الجمعة 4 سبتمبر - 12:41


    إيه هي الأسباب إلي خلتني أفكر في الهجرة
    وإيه السبب إلي خلاني اختار كندا
    واشمعني كيبيك

    أنا هكلمكوا بصراحة
    مش هقول الأسباب إلي قولتها في المقابلة علشان مستشارة الهجرة تقبلني
    و يمكن الي هقوله يفكر ناس كتير بحاجات كانوا مش واخدين بالهم منها
    المهم انها حاجات تخصني انا

    اولا انا سني دلوقتي 37 سنه
    واول مره فكرت في الهجره كان من حوالي اربع سنين
    لما كنت قاعد مع بناتي الاثنين وبفكر
    ياتري انا نفسي كل واحده من بناتي لما يكبروا يصبحوا ايه
    و هتبقي عيشتهم في مصر عامله ازاي
    وافتكرت يوم ما رحت اقدم ليهم في المدرسه الفرنسيه علشان في مزايا كتير في المدرسه

    من اهمها ان عدد الطلاب في الفصل لايزيد عن 20 طالب و احيانا في الثانوي 12 طالب
    وطبعا ده مش بسبب سياسه المدرسه اتبعتها علشان تزيد جودة التعليم
    لكن بسبب ان الفرنساوي مش اللغه المنتشره في مصر وخصوصا في المنصوره

    والثاني ان المدرسن في المدرسه اخذوا دورات تدريبيه في فرنسا
    يعني مؤهلين بشكل مختلف عن اخواننا المدرسين في مصر

    ده زائد ان المدرسه مباني جديده وشكلها جميل ويشجع والمعامل بتاعت الكمبيوتر شكلها يفرح

    وبعد سنتين اكتشفت الحقيقه المرّه
    ان عدد الطلبه القليل في الفصل الي المفروض انه ميزه كبيره للطالب في ان نصيب كل طالب من وقت الحصه اكبر بكتير من اقرانهم الي في المدارس الاخري الي بيزيد عدده في الفصل عن 60 طالب
    اصبح عيب كبير
    عارفين ايه هو

    لما كان العدد كبير في الفصل كان لو الطالب ده مأخدش درس في غيره كتير
    لكن دول ياعيني عددهم قليل يعني المفروض كلهم يدخلوا في الحصّاله

    ولما كانت المدرسين مشاء الله عليهم واخدين دورات في فرنسا
    تبقي الفيزيتا بتاعتهم اضعاف غيرهم

    ده غير ان اجهزة الكمبيوتر المهداه من الاتحاد الاوربي مقفول عليها بباب حديد خوفا عليها من التلف حتي تقادمت

    و ده غير المشكله الكبري ان عارفين ايه هي

    انت عارف انت بتكلم مين ده انا بنت فلان الفلاني
    وانا ابن فلان الفلاني
    المشكله بتاعت كل المصريين

    خالك مين في مصر

    يا خبر ابيض امال انا بنتي بنت مين

    ده انا راجل علي قد حالي من عامة الشعب
    لا انا راجل اعمال ولا منصب مرموق

    المهم يعني من الآخر منظومه تعليم منهاره بشكل متكامل
    سواء من ناحية المناهج التعليميه
    اساليب التدريس الغير مناسبه للنهوض بدوله عريقه زي مصر
    وكذالك استغلال كثير من المدرسين الغير لائق بيهم - كاد المعلم ان يكون رسولا
    ده غير الامراض النفسيه الي بيزرعها الآباء والامهات في ابناءهم

    هتقولولي امال انت اتعلمت ازاي
    هقول احنا كنا قبل الاتهيار الكامل في المنظومه ما يتم
    خرجنا منها لكن يا حسره دخلنا في منظومه لقمة العيش ودي اشد فتكا من الي قبلها
    ده بالاضافه اني مش راضي اصلا عن التعليم الي اتعلمته من اكثر من 13 سنه يعني قبل المنظومه ما تكمل علي الآخر

    علي فكره ده مكنش سبب لقرار الهجرة
    دي كانت مجرد الدافع الأول للتفكير في الهجرة وليس للسفر لدوله عربيه
    لان طبعا إلي في مصر موجود بردوا في الكويت والسعودية
    قد يكون بشكل مختلف لكن كله بيصب في نفس الطريق وهو الطريق الذي يؤدي ال الهاوية

    الدافع الثاني بإختصار هو الحرب علي العراق
    طبعا الشر بره وبعيد عن بلادنا الحبيبه
    لكن الي بيقراء التاريخ هيعرف ان مصر دائما هي المقصودة دائما
    يعني الدور علينا جاي جاي والشر بره وبعيد
    وتخيل كده لو قامت فتنه طائفيه – يا رب ابعد بينا وبين أولاد الحرام
    او حصل انقلاب علي الحكم او الريس ربنا يديله طول العمر مات وحصل خلاف بعده
    في الظروف بتاعتنا دي الوضع خطرجدا

    الدافع الثلث
    كان الانهيار الاقتصادي الي بتمر بيه مصر دلوقتي
    وطبعا بيسمّع معانا احنا المواطنين عن طريق القوه الشرائيه للعمله بتاعتنا الي بتنخفض يوم ورا يوم

    الدافع الرابع
    هو الانهيار الاخلاقي
    وكمان انتشار الرشاوي والمحسوبيه
    و الظريف ان مسؤل كبير في مصر قال في التلفزيون ان مصر هي الدوله الوحيدة الي بتدفع فيها رشوه علشان تأخذ حقك في الوقت الي الرشوه بتدفع في دول تانيه علشان تأخذ حاجه مش حقك !!!

    ده غير كمان – المثل المشهور - لو رحت الجامعه وشفت الي بيحصل هناك !!!

    الدافع الخامس
    الأمان وده بيعتبر من اهم الدوافع
    بين كل حين وآخر نسمع عن خطف الاطفال علشان سرقة الاعضاء البشريه
    ده غير انتشار جرائم القتل
    وطبعا منتقدرش نعتمد علي احصائيات وطنيه لعدم دقتها

    الدافع السادس
    قيمتنا عند نفسنا وقيمتنا عند الغير
    ودي مش هنقف عندها كتير لان الكل يعلم اد ايه المصري غير محفوظ الحق في مصر وخارج مصر علي الاقل في الدول العربيه

    الدافع السابع
    هو الاكل
    انا عاوز آكل واشرب انا وعيالي اكل نظيف و ميه نظيفه قبل ما اموت
    وطبع لايخفي علي احد السموم الموجوده في مياه الشرب والمبيدات المسرطنه الي بتدخل اجسام ابناءنا

    وصدقوني انا مش متشائم ولكن بشوف الحاجات دي لما بلبس نظارة الحقيقه لثواني معدوده
    وارجع تاني اخلعها علشان اعرف اعيش
    وعلي فكره دي مش كل التفاصيل

    كانت دي دوافع الهجره من مصر
    وفي الحلقه القادمه اسباب اختيار كندا

    astrophy
    عضو جديد
    عضو جديد

    عدد المساهمات : 10
    تاريخ التسجيل : 01/09/2009

    رد: مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    مُساهمة  astrophy في الجمعة 4 سبتمبر - 17:12

    فولت كله الى عايز اقوله ينصار يخويا

    دا وغير كمان دا فى اكتر استنى السنتين الى جايين هتشوف مالما تراه عين قبل كدا

    اديك شايف الفساد والمحسوبيه

    ربنا يستر علينا

    enoureldine
    عضو جديد
    عضو جديد

    عدد المساهمات : 5
    تاريخ التسجيل : 01/09/2009

    رد: مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    مُساهمة  enoureldine في الإثنين 7 سبتمبر - 20:59

    والله بعد كلامك مافيش كلام يا استاذ نصار وفعلا السنتين الجايين دول ربنا يستر منهم خصوصا الانتخابات فى 2010 و 2011 والأمور مش واضحة خالص .

    Nassarlink
    عضو
    عضو

    عدد المساهمات : 78
    تاريخ التسجيل : 29/08/2009
    العمر : 45

    رد: مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    مُساهمة  Nassarlink في الثلاثاء 8 سبتمبر - 7:19

    enoureldine كتب:والله بعد كلامك مافيش كلام يا استاذ نصار وفعلا السنتين الجايين دول ربنا يستر منهم خصوصا الانتخابات فى 2010 و 2011 والأمور مش واضحة خالص .



    علي رأي محمد صبحي في ماما امريكا

    الي الجاي اسود من الي راح
    ربنا يسترها معانا

    alaafrench
    عضو جديد
    عضو جديد

    عدد المساهمات : 20
    تاريخ التسجيل : 11/09/2009

    رد: مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    مُساهمة  alaafrench في الثلاثاء 22 سبتمبر - 20:56

    دا اهم سبب بالنسبة للجميع خاصة المتزوجين وعندهم اطفال وربنا يوفقنا جميعا

    amir
    عضو جديد
    عضو جديد

    عدد المساهمات : 8
    تاريخ التسجيل : 03/10/2010

    شكرا جزيلا على المشاركة الرائعة

    مُساهمة  amir في الإثنين 4 أكتوبر - 0:09

    شكرا جزيلا على المشاركة الرائعة

    dr_mohamedimam
    عضو جديد
    عضو جديد

    عدد المساهمات : 5
    تاريخ التسجيل : 03/12/2010

    رد: مشوار الاف ميل ♥♦♣♠ إزاي إبتدي وياتري النهايه هتكون ايه ♥♦♣♠

    مُساهمة  dr_mohamedimam في الجمعة 3 ديسمبر - 14:12

    جزاك الله خيرا على مشاركتك لينا بخبرتك .. و في انتظار باقي تجربتك في السفر إلى كندا.. أنا مازلت في حيرة من أمري .. و نفسي أشوف تجربة واضحة لمن سبقني في الهجرة إلى كندا .. و لكم جزيل الشكر..

    minamoter
    عضو جديد
    عضو جديد

    عدد المساهمات : 1
    تاريخ التسجيل : 27/11/2010

    جزاك الله كل خير

    مُساهمة  minamoter في الخميس 9 ديسمبر - 17:30

    الحقيقة يا اخونا العزيز نصار انك وضعت النقط على الحروف وكمان عاوز اضيف لكلام حضرتك ان دايمااااااااااااااااا الحقيقة بتوجع الناس واحنا فى مصر عايشين موجعين بس برده الهجرة والغربة ليها ضريبتها واتعابها فاليت الله يعمل الخير لكل الناس جزاكم الله كل خير على هذة المعلومات الجميله وانتم السابقون ونحن اللاحقون شكرااااااااااااااااا

      الوقت/التاريخ الآن هو الثلاثاء 22 أغسطس - 14:41